Egipziar filologo batek tesia Atxagaren 'Obabakoak' liburuaren inguruan burutu du

Hanafy Ramadan Hanafy egipziarrak, Filologia Hispanikoan lizentziatua, Bernardo Atxagaren Obabakoak lanaren inguruko tesia irakurri berri du Oviedoko Unibertsitatean.

Ikasketak Egipton burutu zituen Ramadanek, baina urte horietan euskal idazleez ezer ez zietela aipatzen azaltzen du. 'Atxagaren lana nire urtebetetzean egindako opari baten bidez ezagutu nuen, Obabakoak eta Behi euskaldun baten memoriak oparitu zizkidaten eta'. Bere asmoa ipuinaren inguruko tesia egitea izaki, Obabakoak asmo honetara primeran egokitzen zela iritzi zion tesiaren egileak. 'Aukera asko eskaintzen zizkidan, 1001 gauak bezalakoa baita, bere barruan ipuinak daude, eta hauen barruan ipuinak kontatzen dituzten pertsonak. Oso liburu egokia zen eta gainera Egipton gauza berritzailea zen, aurretik ez baitzuen inork landu'.

Tesia gaztelerazko testuaren gainean egin du filologoak, eta ondoren, euskararekin konparaketa soilik formalak burutu ditu, hizkuntza ez baitu ezagutzen. Lanak, dena den, euskal narratibaren inguruko sarrera orokor bat ere badu, irakurlea kokatzeko helburuz.

Atxagaren lanaz gain Saizarbitoria edo Lertxundi bezalako beste egile euskaldunen lanak irakurtzeko aukera izan du Ramadanek, eta oro har, euskal literaturarekiko nabaritzen den ezagutza eza azpimarratzen du, ez soilik Egipton baizik eta Espainian ere. 'Gazteleraz ez dagoen literaturari oso arreta gutxi jartzen zaio'. Beretzat, euskal literaturak espero ez zuen ate bat ireki du. 'Gaur egungo euskal literaturak munduko beste edozein herrikoaren maila du, baina ez da batere ezaguna, eta badu ezaugarri propio bat, erromantizismotik postmodernismora jauzia egiten duela'.

Obabakoak arabiar tradizioko literaturako egile anonimoen lanekin antzekotasunak badituela dio Hanafyk. 'Liburuaren egitura bera arabiar tradizioko ipuin liburuen antzekoa da neurri batean'.